03 Dec, 2018
ရာထူးတိုး လစာတိုးကြပါစေ

လုပ်ငန်းအများစုက အခုလို နိုဝင်ဘာ ဒီဇင်ဘာလရောက်ရင် Performance appraisal (performace evaluation,performace accessment )လုပ်ကြပါပြီ။အမှတ်ပေးဇယားတွေပါတဲ့စာရွက်စာတမ်းတွေ ရှင်းလင်းတင်ပြချက်တွေ၊အကဲဖြတ်မယ့်အချက်တွေ အစရှိတာတွေကို သက်ဆိုင်ရာ ဌာနအကြီးအကဲတွေလက်ထဲ၊ ၀န်ထမ်းတွေလက်ထဲပို့ပြီးကြပါပြီ။ဒီဇင်ဘာလကုန်မှာ ရာထူးတိုးလစာတိုးစာရင်းထွက်နိုင်ဖို့ တက်သုတ်ရိုက်ပြီး ဆောင်ရွက်နေကြပါပြီ။ ၀န်ထမ်းတွေကလည်း ရာထူးတိုး လစာတိုးမျှော်မှန်းနေကြပါပြီ။ လုပ်သက်ရင့်ဝန်ထမ်းတွေတင် မကဘူး၊လုပ်သက်နုဝန်ထမ်းတွေလည်း မျှော်လင့်ကြတာပါ။ဒါကြောင့် စနစ်တကျလုပ်ဆောင်တာဖြစ်ဖြစ်၊ သမားရိုးကျလုပ်ဆောင်တာဖြစ်ဖြစ် အမှားအယွင်းနည်းနိုင်သမျှနည်းအောင်၊ အဂတိလိုက်စားမှုနည်းနိုင်သမျှနည်းအောင် ဆောင်ရွက်နိုင်ကြဖို့ အကူအညီအထောက်အပံ့ရပါစေဆိုသော စိတ်ဖြင့် ရေးသားတင်ပြပါတယ်။

အကဲဖြတ်အမှတ်ပေးဖို့ သတ်မှတ်ချက်တွေရှိထားပြီးပြီဟု ထင်ပါတယ်။သတ်မှတ်ချက်များဆိုရာမှာလည်း အလုပ်ခန့်ထားစဉ်က အင်တာဗျူးခန်းထဲတွင် ကိုင်စွဲအသုံးပြုခဲ့သော အလုပ်အကိုင်ဖော်ပြချက်များကို ဆိုလိုတာမဟုတ်ပဲ ၀န်ထမ်းတစ်ဦး ယခုနှစ် တစ်နှစ်တာအတွင်း အလေးထားအကောင်အထည်ဖော်ပေးရမယ့် အလုပ်တာဝန် ၄-၅ချက်လောက်ကို ပြောတာပါ။ နှစ်စဉ်ပြောင်းလဲနေတဲ့ စီးပွားရေးလောကရဲ့ အပြောင်းအလဲများ၊လုပ်ငန်းအတွင်းအပြောင်းအလဲများနဲ့ချိန်ညှိပြီး သတ်မှတ်ပေးရတာပါ။အဲဒီ ၄-၅ချက်လောက်ဆိုပေမယ့် အတော်များများကို ခြုံငုံမိအောင်ဖော်ပြထားတဲ့ အချက်များဖြစ်ပါတယ်။

အင်တာဗျူးခန်းမထဲမှာ ကိုင်စွဲပြီး အလုပ်လာလျှောက်သူကိုလုပ်နိုင်မလုပ်နိုင် လုပ်တတ်မလုပ်တတ် မေးမြန်းခဲ့တဲ့ အလုပ်တာဝန်ဖော်ပြချက်များဟာ များပြားလွန်းပါတယ်။ဝန်ထမ်းတစ်ယောက် တာဝန်ငြင်းဆန်ခြင်းမပြုနိုင်လောက်အောင်အထိ ရေးသားဖော်ပြကြပါတယ်။ ဆောင်ရွက်ရန်ရှိသည်ဖြစ်စေ မရှိသည်ဖြစ်စေ ဆောင်ရွက်နိုင်သည်ဖြစ်စေ မဆောင်ရွက်နိုင်သည်ဖြစ်စေ ကျွန်တော် ကျွန်မ အလုပ်တာဝန်မဟုတ်ပါဘူးလို့ ငြင်းဆန်မရအောင် ထည့်သွင်းထားတတ်ကြလို့ မျှတမှုမရှိသလို သဘာဝလည်းမကျပါဘူး။ ဒီ အလုပ်အကိုင်ဖော်ပြချက်ဟာ ယေဘုယျမှန်ချင်မှန်နိုင်ပေမယ့် တစ်နှစ်ပတ်လုံး ဦးစားပေး အကောင်အထည်ဖော်ဖို့အတွက်တော့ လုပ်ငန်းရဲ့ အနေအထားကိုကြည့်ပြီး နှစ်စဉ်သီးခြားရွေးချယ်ပေးရပါတယ်။မူလ အလုပ်အကိုင်ဖော်ပြချက်ထဲက အချက်တွေဖြစ်နိုင်သလို နှီးနွယ်တဲ့အချက်တွေလည်းဖြစ်နိုင်ပါတယ်။စီးပွားနှစ် တစ်နှစ်နဲ့တစ်နှစ် သတ်မှတ်ချက်တွေ ပြောင်းလဲနေနိုင်ပါတယ်။အဲသလို ရွေးချယ်သတ်မှတ်ဖော်ပြထားတာတွေကိုပဲ ဘယ်အချက်ကို ပိုပြီး အာရုံစိုက်၊ဘယ်အချက်ကတော့ ဘယ်လောက်အထိအကောင်အထည်ဖော်နိုင်ရင်ရပြီ စသည်ဖြင့် သတ်မှတ်ပေးရပါတယ်။ နောက်တစ်ချက်ကတော့ ကိုယ့်လုပ်ငန်းအတွက် ကိုယ်တာဝန်ပေးချင်တာပေးပြီးရုံနဲ့ မလုံလောက်သေးပါဘူး။ ၀န်ထမ်းအတွက်လည်း ထည့်သွင်းစဉ်းစားရပါသေးတယ်။ဒီနှစ်အတွင်း ဘယ်စာအုပ်တွေဖတ်ပါ။ ဘယ်သင်တန်းတွေတက်ပါ၊ဘယ်ဟောပြောပွဲတွေတက်ပါ စသည်ဖြင့် career development အတွက် အချက်တွေ ထည့်သွင်းသတ်မှတ်ပေးရပါသေးတယ်။ဝန်ထမ်းတွေရဲ့ဖွံ့ဖြိုးတိုးတက်မှုအတွက် အဖွဲ့အစည်းက တာဝန်ယူဆောင်ရွက်ကြတာရှိသလို ၀န်ထမ်းတွေကိုယ်တိုင်ကိုပဲ တာဝန်ပေးတာမျိုးရှိပါတယ်။နှစ်ဦးနှစ်ဖက်ညှိနှိုင်းပြီး ဆောင်ရွက်ကြာတာအကောင်းဆုံးပါ။အချို့အဖွဲ့အစည်းတွေ့ ၀င်ငွေကောင်းတဲ့အပြင် ရင်းနှီးမြှုပ်နှံမှုများပြားပြီး ၀န်ထမ်းရေးရာကို အာရုံစိုက်တဲ့အတွက် လေ့ကျင့်သင်ယူမှုအတွက် ကုန်ကျစရိတ်အများစုကို အဖွဲ့အစည်းကပဲ တာဝန်အပြည့်ယူတတ်ကြပါတယ်။

ကြီးကြပ်သူနဲ့ လက်အောင်ဝန်ထမ်းတို့ အပြန်အလှန်သဘောတူထားတဲ့ အလုပ်တာဝန်သတ်မှတ်ချက်ကိုလည်းပြောပြီးပြီ။ဘာကို ဘယ်လောက်လုပ်ရမယ်ဆိုတာလဲ ပြောပြီးပြီ။ဘယ်လိုအနေအထားနဲ့ လုပ်ရမယ့်ဆိုတာလဲပြောပြီးပြီ၊ထားရှိရမယ့်စိတ်ဓါတ် ခံယူချက် ခေါင်းဆောင်မှုစွမ်းရည် စတာတွေကိုလည်း သိရှိနားလည်နေကြပြီ ။ ဒါဆိုလုံလောက်ပြီလား။မလုံလောက်သေးပါဘူး။ တာဝန်ပေးစေခိုင်းနိုင်ဖို့ အလုပ်စတင်ဝင်ရောက်ကတည်းက အသေအချာ မေးမြန်းစိစစ်ထားပေမယ့် အကြောင်းကြောင်းတွေကြောင့် အဆင်မပြေ အံမ၀င်ဂွင်မကျတာတွေ ရှိနိုင်ပါသေးတယ်။ အင်တာဗျူးကာလ နာရီတိုအတွင်းမှာ အကောင်းဆုံးအကဲဖြတ်နိုင်ဖို့ မလွယ်ပါဘူး။ဖြစ်နိုင်မယ် / သင့်တော်မယ်ထင်လို့ ရွေးချယ်လိုက်ရပေမယ့် ထပ်ဆင့် မွမ်းမံ၊သင်ကြားပြသပေးရမယ့် အနေအထားတွေရှိတတ်ပါတယ်။ Coaching, Mentoring,Demonstrating ,Counselling အစရှိတာတွေ လုပ်ပေးရပါသေးတယ်။ကြီးကြပ်သူတွေဟာ မိမိဝန်ထမ်းကို မင်းဒါလုပ်၊ဒါတွေကို မလုပ်နဲ့ဆိုပြီး သမံကာလျှံကာပြောပြီး တစ်နှစ်ပတ်လုံးပြစ်ထားလို့မရပါဘူး။ အဆက်မပြတ်အကဲခတ်နေရပြီး လိုအပ်တာပံ့ပိုးပေးနေ ရပါတယ်။ လမ်းကြောင်းတည့်ပေးနေရပါတယ်။ သင်ပြပေးနေရပါတယ်။ ဒါမှ လိုအပ်တဲ့ ပန်းတိုင်(Business goals)ကို ရောက်မှာပါ။ တစ်ယောက်ချင်းအောင်မြင်မှ တစ်စုအောင်မြင်မှာပါ၊တစ်စုချင်းအောင်မြင်မှ တစ်ဌာနအောင်မြင်မှာပါ။တစ်ဌာနချင်းအောင်မြင်မှ လုပ်ငန်းတစ်ခုလုံးအောင်မြင်မှာပါ။ဒါကို လူတိုင်းနီးပါးသိရှိထားကြပေမယ့် အလုပ်တာဝန်ထမ်းဆောင်ကြတဲ့အခါ ဒီအချက်ကို မေ့လျော့နေတတ်ကြပါတယ်။

လုပ်ရမယ့် အလုပ်တွေလည်း ပြောပြီးပြီ။လုပ်ရမယ့် အတိုင်းအတာပမာဏကိုလည်းပြောပြီးပြီ။လုပ်ပုံလုပ်နည်းကိုလည်း ပြောပြီးပြီ၊လေ့ကျင့်သင်ကြားရေးနဲ့ပတ်သက်ပြီးတော့လည်း လုပ်ငန်းအတွင်း လုပ်ကိုင်ရင်းသင်လိုက်၊ပြင်ပသင်တန်းဌာနတွေမှာ ပို့ပြီးသင်လိုက်၊ ကျွမ်းကျင်သူ သင်တန်းဆရာကိုခေါ်ပြီးသင်လိုက် စသည်ဖြင့် သင်ကြားပြသမှုတွေ လေ့ကျင့်မှုတွေလည်း လုပ်ပြီးပြီ။ ဒါဆိုလုံလောက်ပြီလား။အခုလိုနှစ်ကုန်ရင် ၀န်ထမ်းစွမ်းဆောင်ရည်ကို အကဲဖြတ်လို့ရပြီလား။ နည်းနည်းလေးလိုပါသေးတယ်။စိတ်ပါလက်ပါနဲ့ စေတနာထားပြီးလုပ်ကြဖို့လိုပါတယ်။မိမိတာဝန်မိမိကျေပွန်ရုံနဲ့ မပြီးပါ။အခြားသူများရဲ့လိုအပ်ချက်များကိုလည်း ပံ့ပိုးနိုင်ဖို့လိုပါသေးတယ်။အထူးသဖြင့် ခေါင်းဆောင်မှုစွမ်းရည်နှင့် အသင်းအဖွဲ့စိတ်ဓါတ်မြင့်မားခြင်းဟာ အဖွဲ့အစည်းတွေ အောင်မြင်ခြင်းရဲ့ လျှို့ဝှက်ချက်ပဲဖြစ်ပါတယ်။ စီးပွားရေးအဖွဲ့အစည်းတွေမှာဖြစ်ဖြစ် အစိုးရအဖွဲ့အစည်းတွေမှာဖြစ်ဖြစ် ရာထူးတာဝန်အလိုက် ထားရှိရမယ့် ပိုင်ဆိုင်ရမည့် ခေါင်းဆောင်မှုစွမ်းရည် အဆင့် မတူပါဘူး။ရာထူးမြင့်မားလေလေ ခေါင်းဆောင်မှုစွမ်းရည် မြင့်မားရလေလေပါပဲ။ဝန်ထမ်းတွေဟာ မိမိပိုင်ဆိုင်ထားရမယ့် ခေါင်းဆောင်မှုစွမ်းရည်တွေကို သိရှိထားဖို့ အဖွဲ့အစည်းကတရားဝင် အသိပေးကြေငြာပေးထားရမှာ ဖြစ်ပါတယ်။

တစ်နှစ်ပတ်လုံး ထိန်းကျောင်းလာခဲ့တယ်။လိုအပ်ချက်ရှိတဲ့ ၀န်ထမ်းတွေကိုလည်း ဖေးဖေးမမ သင်သင်ပြပြနဲ့ တွဲခေါ်လာခဲ့တယ်။အပြင်းချီတက်ခဲ့ကြတယ်။အောင်မြင်သင့်သလောက်အောင်မြင်ကြတယ်။ဒီလိုနဲ့ အကဲစွမ်းဆောင်မှုကို အကဲဖြတ်ချိန်ရောက်လာပါပြီ။လူသားတွေဖြစ်တဲ့အတွက် တစ်ဦးကိုတစ်ဦး အကဲဖြတ်ကြရာမှာ အဂတိလိုက်စားတာမျိုးတွေရှိတတ်ပါတယ်။ရှိလည်းရှိနေကြပါတယ်။ဒါပေမယ့် လွန်လွန်ကျူးကျူး မဖြစ်ရလေအောင် ရှောင်ရှားရမှာပါ။

အကဲဖြတ်တဲ့နေရာမှာ သတိထားရမယ့်အချက်လေးတွေ အမှားအယွင်းဖြစ်နိုင်တာလေးတွေ ပြောပါဦးမယ်။

  • အလုပ်တာဝန်သေသေချာချာ သတ်မှတ်မပေးပဲ  အကဲဖြတ်မိတတ်ကြပါတယ်။
  • အလုပ်တာဝန်တွေတော့ ပေးထားပြီး သင်ကြားပြသမှု မရှိပဲ အောင်မြင်ပြီးမြောက်မှုကို အကဲဖြတ်မိတတ်ကြပါတယ်။
  • တစ်နှစ်ပတ်လုံး အလေလိုက်နေတဲ့ဝန်ထမ်းကို အကဲဖြတ်ကာနီးကာလအတွင်းက ဆောင်ရွက်ချက်အကောင်းများကိုသာ ကြည့်ပြီး အကဲဖြတ်မိတတ်ကြပါတယ်။
  • တစ်နှစ်ပတ်လုံး အကောင်းဆုံးတာဝန်ထမ်းဆောင်ခဲ့ပေမယ့် အကဲဖြတ်ကာနီးကာလအတွင်းခြေချော် လက်ချော်ဖြစ်သွားတဲ့ ၀န်ထမ်းကို မှားယွင်းအမှတ်ပေးမိတတ်ကြပါတယ်။
  • ငါကိုယ်တိုင်ခန့်ထားတဲ့ဝန်ထမ်း၊သူ့ကို ညံ့လို့ အကဲဖြတ်လိုက်ရင် ငါပါညံ့သွားမှာစိုးရလို့ ငါ့ကိုလည်း လူညံ့လို့ ထင်သွားကြမှာစိုးလို့ စွမ်းဆောင်ရည်ကောင်းတယ်လို့ ပြောင်းလဲ အကဲဖြတ်လိုက်မိတာမျိုး ဖြစ်တတ်ပါတယ်။
  • ငါနဲ့ အကြိုက်ချင်းတူ၊စိတ်သဘောထားချင်းလဲတူ၊၀ါသနာလည်းတူ၊အတွေးအခေါ်လဲတူတဲ့လူမို့ လူကောင်းလူတော်ဆိုပြီး မှားယွင်း အကဲဖြတ်မိတတ်ကြပါတယ်။အမှတ်ပိုပေးမိတတ်ကြပါတယ်။
  • ထို့အတူဆန့်ကျင်ဖက်အဖြစ် ငါနဲ့ဘယ်အရာမှ ညှိလို့မရတဲ့ဝန်ထမ်းပဲဆိုပြီး အမှတ်လျော့ပေးတာမျိုး ဖြစ်တတ်ပါတယ်။
  • ဘာတာဝန်မှ မယ်မယ်ရရမရှိ၊ဖြစ်ဖြစ်မြောက်မြောက်မရှိသော်လည်း အလိုလိုနေရင်း အထင်ကြီးလေးစားရသူမို့ အမှတ်တွေပိုပေးမိတာမျိုး ဖြစ်တတ်ပါတယ်။
  • သူ့လူ ကိုယ့်လူ မခွဲခြား၊သို့သော် ဘာလာလာ အလယ်အလတ်တန်းစား အမှတ်ပေးနည်းကို ကျင့်သုံးမိတာမျိုးလည်း ဖြစ်တတ်ပါတယ်။ဇာတ်ရှုပ်ထဲ မ၀င်ချင်တဲ့အကဲဖြတ်သမားလူမျိုးတွေပေ့ါ။
  • ရာထူးတိုး လစာတိုးပေးလိုက်ရင် ငါ့လူဖြစ်လာမှာပဲဆိုတဲ့ အတွေးနဲ့ အမှတ်ပိုပေးမိလိုက်တာမျိုးဖြစ်တတ်ပါတယ်။

အကဲဖြတ်သူတွေဟာ သမာသမတ်ရှိရပါ့မယ်။ဘက်လိုက်တာမျိုး အမြင်ေ၀၀ါးတာမျိုးမဖြစ်ရပါဘူး။စိတ်ခံစားချက်ကို ဦးစားပေးလွန်းတာမျိုးလည်း မဖြစ်သင့်ပါဘူး။လူသားဖြစ်နေသည့်အတွက် အတ္တအနည်းငယ်ရှိတတ်တာမျိုးကို လက်ခံပေမယ့် မမျှတတာမျိုးကို လက်မခံသင့်ပါ။ကိုယ်ရေးကိုယ်တာကို ဦးစားပေးတာမဟုတ်ပဲ လုပ်ငန်းရေရှည်ရပ်တည်ရေးအတွက်သာ စဉ်းစားတတ်တဲ့ အလေ့အကျင့်မျိုး ပြုစုပျိုးထောင်ထားရမှာဖြစ်ပါတယ်။

လုပ်ငန်းရှင်သန်ရပ်တည်ရေးအတွက် ၀န်ထမ်းတွေဟာ အဓိကသော့ချက်ဆိုတာ နားလည်ထားကြမှာပါ။ဝန်ထမ်းတွေဟာ Equity မျှတမှုကို လိုလားကြပါတယ်။စီမံအုပ်ချုပ်သူတို့ရဲ့ မျှတတဲ့ ဆုံးဖြတ်မှုကို လိုချင်ကြပါတယ်။မိမိဂုဏ်သိက္ခာ လုပ်ငန်းဂုဏ်သိက္ခာကို ထည့်သွင်းစဉ်းစားပြီး အမှားအမှန်ကို ဆုံးဖြတ်ကြစေချင်ပါတယ်။

ကြီးကြပ်သူများ အနှောင်အဖွဲ့ကင်းကင်းနဲ့ အကဲဖြတ်ပေးနိုင်ကြပါစေ။ဝန်ထမ်းများမှလည်း အရှိတရား အမှန်တရားကို လက်ခံနိုင်ကြပါစေ။

မင်းနိုင်(ရွှေဘို)

 

Previous Next