17 Dec, 2018
ဝန်ထမ်းတွေကို သီးသီးသန့်သန့်ထားသင့်ပါသလား

Job Design and Organizational Design တို့အရ ၀န်ထမ်းတွေကို သီးသီးသန့်သန့်ထားကြပါတယ်။ဌာနတစ်ခုနဲ့တစ်ခုရောရောနှောနှော ရင်းရင်းနှီးနှီးဆက်ဆံကြတာမျိုးကိုအလိုမရှိကြဘူး။အချို့က Job Functions များအရသော်လည်းကောင်း၊လုပ်ငန်းရုံးခွဲများအရသော်လည်းကောင်း ၀န်ထမ်းတွေကို ပိုပြီးသီးသန့်ထားတတ်ကြပါတယ်။ ကောင်းကျိုးလည်းရှိနိုင်သလိုဆိုးကျိုးလည်းရှိပါတယ်။

ဥပမာအရောင်းဌာနကလူတွေနဲ့ ထုတ်လုပ်ရေးဌာနကလူတွေကိုတစ်ပတ်တစ်ကြိမ်သာတွေ့ဆုံစေခြင်း၊ ရုံးခန်းများခွဲခြားထားခြင်းအစရှိသောဌာနများအလိုက် သီးခြားခွဲခြားထားခြင်းသည် မြန်မာလုပ်ငန်းအဖွဲ့အစည်းများတွင် ပုံမှန်တွေ့နေကြရသော သဘောသဘာဝများဖြစ်တယ်။အထူးသဖြင့် ကျွန်တော်တို့မြန်မာလူမျိုးများဟာညှိနှိုင်းဆွေးနွေးခြင်း၊ ပူးပေါင်းဆောင်ရွက်ခြင်း၊ ခင်မင်ရင်းနှီးစွာအမြင်ဖလှယ်ခြင်းတို့၏ ရေရှည်အကျိုးကိုမမြင်နိုင်ကြသေးတာလဲ ဖြစ်နိုင်ပါတယ်။ Individualism ကိုပိုပြီးအားထားကြသောလူ့ဘောင်စရိုက်တစ်မျိုးပဲဖြစ်ပါတယ်။ အမြင်တူသူများနှင့်ပူးပေါင်းဆောင်ရွက်သင့်သကဲ့သို့ အမြင်မတူသူများအတွေးအခေါ်မတူသူများနောက်ခံဖြတ်သန်းခဲ့ရာလမ်းကြောင်းမတူသူများ၊လေ့လာသင်ယူခဲ့ရသောပညာရပ်ဆိုင်ရာမတူသူများနှင့် အတူပူးပေါင်းဆွေးနွေးညှိနှိုင်းဆောင်ရွက် ရခြင်းသည် ပြိုင်ဘက်များထက် ထူးခြားကောင်းမွန်သောအကျိုးခံစားရတတ်တာကိုသတိမထားမိကြတာလဲဖြစ်နိုင်ပါတယ်။

မြန်မာကုမ္ပဏီအများစုကတော့ အရောင်းဌာန၊ဈေးကွက်ရှာဖွေဖန်တီးရေးဌာန၊စီမံဌာန၊၀န်ထမ်းရေးရာဌာန၊ သယ်ယူပို့ဆောင်ရေး ဌာန၊ငွေစာရင်းဌာန၊စာရင်းစစ်ဌာန၊ငွေကိုင်ဌာန၊၀န်ဆောင်မှုဌာန၊အင်ဂျင်နီယာဌာန၊ပြုပြင်ထိန်းသိမ်းရေးဌာန၊ကွန်ပြူတာဌာန၊စတိုစသည်ဖြင့် သီးခြားအုပ်စုလေးတွေခွဲခြားထားတတ်ကြပါတယ်။ဌာနအကြီးအကဲတွေ တာဝန်ပေးခန့်အပ်ပြီးမိမိဌာန မိမိတာဝန်ယူ ဆိုသောအယူအဆများကိုရိုက်သွင်းမိတတ်ကြပါတယ်။ဝန်ထမ်းတွေကို တစ်ဦးနှင့်တစ်ဦးတစ်ဌာနနှင့်တစ်ဌာနခွဲခြားဆက်ဆံခိုင်းလိုက်သလိုကန့်သတ်လိုက်တဲ့ပုံစံမျိုးဖြစ်သွားတာပေ့ါ။

တစ်ဌာနရဲ့ လုပ်ဆောင်မှုတွေကိုအခြားဌာနတွေကမသိနိုင် မမြင်နိုင်ဖြစ်သွားတယ်။ရည်ရွယ်ချက် ဦးတည်ချက်တွေ မသိနိုင်တော့ဘူး။အတွင်းသတင်း၊အတွင်းစကားတွေကိုမပေါက်ကြားစေလိုတဲ့ရည်ရွယ်ချက်တစ်ခုကြောင့် အခြားဌာနက၀န်ထမ်းတွေနဲ့ နီးနီးကပ်ကပ်ပူးပေါင်းဆောင်ရွက်မှုကိုတားမြစ်လိုက်သလိုဖြစ်သွားတတ်ပါတယ်။တစ်ဌာနနဲ့ တစ်ဌာန ၊၀န်ထမ်းတစ်ဦးနဲ့တစ်ဦး ခွဲခြားထားလိုက်ခြင်းဟာမသမာမှုများဘက်လိုက်မှုများကိုလက်ရပ်ခေါ်သလို ဖြစ်လာနိုင်သည့်အပြင် လုပ်ငန်းကျဆုံးခြင်းကိုပင် ရင်ဆိုင်ရတတ်ပါတယ်။

မိမိဌာနသာအရေးပါအရာရောက်တယ်လို့မြင်အောင် သွေးထိုးပေးတတ်တဲ့ စီမံအုပ်ချုပ်သူတွေရှိပါတယ်။ဒါကြောင့် တစ်ဌာနနဲ့တစ်ဌာနလုပ်ငန်းသဘောမှလွဲပြီးမပြောနိုင်မခေါ်နိုင် မပြုံးနိုင် မရယ်နိုင်နဲ့ Employee Relation ,Team Spirit ပျောက်ဆုံးလာပြီးနောက်ဆုံး Productivity ကျဆင်းလာကြရပါတယ်။ ပွင့်လင်းမြင်သာတဲ့ဆက်ဆံရေးများပျောက်ဆုံးသွားပြီး ၀န်ထမ်းတွေရဲ့စိတ်ဓါတ်ရေးရာများ ပျက်ဆီးသွားတတ်တာကိုမျက်မြင်ကိုယ်တွေ့ ကြုံခဲ့ဖူးပါတယ်။

Job functions များအရ တာဝန်တစ်ခုဆောင်ရွက်ရန်ရှိသည့်အခါတွင်လည်း အစည်းအဝေးများတွင်သာ တွေ့ဆုံဆွေးနွေးကြပြီးဆုံးဖြတ်ချက် မြန်မြန်ချ၊အကောင်အထည်ဖော်လုပ်တတ်ကြပါတယ်။Efficient မဖြစ်တဲ့ Result တွေသာထွက်ပေါ်လာတတ်ပါတယ်။စိတ်ပါလက်ပါ ဆွေးနွေးကြတာမျိုး၊အသိအမြင်ဖလှယ်ကြတာမျိုး၊ အပြန်အလှန်ငြင်းခုန်ကြတာမျိုး၊BrainStromingလုပ်ကြတာမျိုး၊ ဝေဖန်ထောက်ပြကြတာမျိုး၊အများသဘောတူလက်ခံကြတာမျိုးမရှိတော့ပဲ မြန်မြန်ပြီးပြတ်အောင်သာသဘောတူလိုက်ကြပြီးအကောင်အထည်ဖော်ကြလို့ အသက်မပါသောဆောင်ရွက်ပြီးစီးမှု တစ်ခုသာဖြစ်သွားကြတယ်။Job Done ဖြစ်ပေမယ့် Accomplished မဖြစ်။

ဝန်ထမ်းချင်းအစေးမကပ်သည့်အပြင် စီမံအုပ်ချုပ်သူများနှင့်လည်းအချင်းချင်းအစေးမကပ်ကြတော့။Business Communication line တွေပျက်၊Misinformation တွေဖြစ်၊Wrong Decision တွေချ၊Weak Operation တွေနဲ့ကြုံ၊Bad Results တွေရ။ နှာတဖျားသာခြင်းတွေ ဆုံးရှုံး။နောက်ဆုံးလုပ်ငန်းရော ၀န်ထမ်းရော စိတ်ဓါတ်ရေးရာများပျက်စီး။ ဆက်လက်ဆောင်ရွက်လိုစိတ်ပျောက်။ လက်မြှောက်အရှုံးပေးသွားကြတယ်။

လုပ်ငန်းဌာနများသီးခြားခွဲခြားထားရခြင်းသည် ဆောင်ရွက်မှုမြန်ဆန်စေရန်နှင့် တိကျအောင်မြင်စေရန်သာ ဖြစ်သင့်ပါတယ်။ ခွဲခြားနေထိုင် လုပ်ကိုင်ဖို့မဖြစ်သင့်ပါ။သွေးခွဲအုပ်ချုပ်ခြင်းသဘောဆန်လွန်းလှပါတယ်။ စီးပွားရေးအဖွဲ့အစည်းတွေ လုပ်ငန်းတစ်ခုပရောဂျက်တစ်ခုဆောင်ရွက်ရတော့မယ့်အခါမျိုးမှာ ကျွမ်းကျင်ပိုင်နိုင်မှု အမျိုးမျိုးလိုအပ်ပါတယ်။သီးခြားစီရှိနေတဲ့ ကျွမ်းကျင်ပိုင်နိုင်မှုတွေကိုစုစည်းရမှာဖြစ်ပါတယ်။ဆောင်ရွက်မယ့် ပရောဂျက်အကြောင်းကိုအမြင်အမျိုးမျိုးကဝေဖန်ကြပြီးအကောင်းဆုံးသောနည်းလမ်းဖြင့် အကောင်အထည်ဖော်ရမှာဖြစ်ပါတယ်။ဒါကြောင့် ပါဝင်ဆောင်ရွက်မယ့် ဌာနအသီးသီးက ၀န်ထမ်းအသီးသီးကို နွေးထွေးစွာဆက်ဆံလို့ရမယ့် အသိုင်းအ၀န်းတစ်ခုဖန်တီးပေးထားပြီး သတင်းအချက်အလက် အကန့်အသတ်မဲ့ ရယူနိုင်တဲ့အနေအထားတစ်ခုကိုလည်းဆောင်ရွက်ပေးထားရပါမယ်။Line of command တစ်ခုတည်ထားပေးပြီး ပြီးစီးဆောင်ရွက်မှုအနေအထားအားလုံးကို အဖွဲ့ဝင်အချင်းချင်း အဆက်မပြတ် သိရှိနေရမှာဖြစ်ပါတယ်။ သတင်းပို့ဆောင်ရွက်မှု လမ်းကြောင်းမပြတ်တောက်ရအောင်လည်းသတိထားရပါ့မယ်။ ညွှန်ကြားချက်အားလုံးကို အဖွဲ့ဝင်အားလုံးက သိရှိနေမယ်ဆိုရင် ပြီးမြောက်အောင်မြင်ဖို့ အလွန်နီးစပ်ပါတယ်။ ဒါဥပမာတစ်ခုပါ။

အခုနောက်ပိုင်းကုမ္ပဏီတွေမှာရုံးခန်းဖွဲ့စည်းပုံကအစအလုံပိတ်အခန်းများကာရံခြင်းမပြုတော့ပဲဟင်းလင်းပြင်ရုံးခန်းကျယ် အတွင်းမှာဌာနစုများသတ်မှတ်ကာဖွဲ့စည်းလာကြပါပြီ။စီမံအုပ်ချုပ်သူလူကြီးများပါ ထိုရုံးခန်းဖွဲ့စည်းပုံအတွင်းပါဝင် ရုံးထိုင်ကြပါတယ်။တစ်ဦးနဲ့တစ်ဦး မြင်နေရပြီးပြောဆိုဆွေးနွေးတဲ့စကားများပါ ကြားနိုင်တဲ့အနေအထားတစ်ခု ဖြစ်လာပါတယ်။ ကောင်းတဲ့အလေ့အကျင့်တစ်ခုပါ။အဖွဲ့အစည်းတွေမှာ လျှို့ဝှက်ရမည့် စာရွက်စာတမ်းများ၊အကြောင်းအရာများလျှော့ချနိုင်သမျှ လျှော့ချဖို့ သင့်ပါပြီ။သို့သော် စီးပွားရေးကျင့်ဝတ်ကောင်းသော ၀န်ထမ်းများနှင့်အဖွဲ့အစည်းတစ်ခုဖြစ်ရန်ကိုမူအထူးလေ့ကျင့်ပေးသည့် Organizational Culture တစ်ခုတော့ အစောကြီးကတည်းမွေးမြူထားရပါ့မယ်။အတူလုပ် အတူစားအတူသွားအတူနေအစရှိသောအကျင့်များကိုလည်းရှိနေစေသင့်ပါတယ်။

စားသောက်ခန်းများအတွင်း၊အစည်းအဝေးခန်းမများအတွင်း၊ အားကစားခန်းမများအတွင်းဝန်ထမ်းများထိုင်ရသည့် နေရာများကိုပင် ဌာနတူစုဖွဲ့ထိုင်ခြင်းမျိုးလက်မခံတော့ပဲဌာနစုံလူစုံထိုင်ရသည့်စနစ်ကိုဖန်တီးပေးထားသင့်ပါတယ်။ နွေးထွေးတဲ့ဆက်ဆံရေးရှိရပါမယ်။လုပ်ငန်းနဲ့ပတ်သက်ပြီးသံသယကင်းကင်းနဲ့ တင်ပြပြောဆိုရဲတဲ့ သတ္တိမွေးပေးထားရပါ့မယ်။အပြန်အလှန်ဆွေးနွေးတဲ့ အကျင့်ကိုလည်းမွေးမြူပေးထားရပါ့မယ်။ဆင့်ကဲတင်ပြဆုံးဖြတ်ချက်ခံယူရတာကောင်းပါတယ်။လိုအပ်ရင် အမြင့်ဆုံးလူအထိတိုက်ရိုက်တက်ပြီးဆုံးဖြတ်ချက်ခံယူရတာမျိုးကိုလည်းအားပေးထားရပါ့မယ်။ ဒါပေမယ့် အကန့်အသတ်တော့ရှိရမှာပေ့ါ။ဝန်ထမ်းတိုင်းဟာ အသေးအမွှားလေးကအစစီအီးအိုအထိတက်ပြီးတင်ပြနေမယ်ဆိုရင် အလုပ်မဖြစ်တော့ဘူး။ရှေ့မရောက်တော့ဘူး။ဒီလိုကိစ္စများကို ၀န်ထမ်းများကိုတိုင် ဆုံးဖြတ်ချက်ချနိုင်တဲ့အနေအထားတစ်ခုကျင့်ထားပေးရပါ့မယ်။လုပ်ပိုင်ခွင့်ပေးထားရပါ့မယ်။

ရုံးခန်းတွေအတွင်းမှာ ရှုပ်ပွနေခြင်းဟာအလုပ်များနေခြင်းရဲ့သင်္ကေတတစ်ခုဖြစ်ပါတယ်။ဝန်ထမ်းတွေနဲ့ ပြည့်ကျပ်နေတဲ့ ရုံးခန်းတွေဟာလူသားဆန်ပါတယ်။စိတ်ကူးစိတ်သန်းကောင်းတွေ ထွက်ရှိရာဘူမိနက်သန်နေရာလည်းဖြစ်တယ်။ သန့်ရှင်းသပ်ရပ်ပြီးသီးခြားဆန်တဲ့ရုံးခန်းများရှိတဲ့ လုပ်ငန်းတစ်ခုနဲ့ ၀န်ထမ်းများခြေချင်းလိမ်းနေကာရှုပ်ပွ ပေရေနေသောရုံးခန်းများရှိတဲ့လုပ်ငန်းတစ်ခုရဲ့ အောင်မြင်မှုတွေကို နှိုင်းယှဉ်လေ့လာရာမှာထူးခြားစွာအံ့အားသင့်ဖွယ်ရာတွေ့ရှိခဲ့ပါတယ်။ ရှုပ်ပွနေသော စုပြုံတိုးဝေးနေရသော ၀န်ထမ်းများနဲ့ဖွဲ့စည်းထားတဲ့ရုံးခန်းများရှိတဲ့ လုပ်ငန်းကပိုပြီးအောင်မြင်တာကိုတွေ့မြင်ရပါတယ်။ဒါကြောင့် မိဘများကငယ်ငယ်ကသင်ကြားပေးခဲ့ကြတဲ့ သပ်သပ်ရပ်ရပ် သန့်သန့်ရှင်းရှင်းနေဆိုတဲ့ အယူအဆဟာကုမ္ပဏီဖွဲ့စည်းပုံတွေနဲ့ ဆန့်ကျင်နေတာကိုတွေ့ရပါလိမ့်မယ်။လူဆိုတာအရှုပ်တွေထဲမှာပဲကျင်လည်ကျက်စားတတ်ကြတာမျိုးပါ။

ထိုင်လျှက် လက်တို့ပြီး ၀န်ထမ်းအချင်းချင်း လုပ်ဖော်ကိုင်ဖက်အချင်းချင်းစကားပြောလို့ရနိုင်သောလုပ်ငန်းခွင်များထက် အခန်းတခါးခေါက်ဝင်ကာ တကူးတကသွားတွေ့ရသောလုပ်ငန်းခွင်များကပိုမိုလေးလံထိုင်းမှိုင်းနေတာကိုတွေ့မြင်နိုင်မှာပါ။ စိတ်ကူးစိတ်သန်းအကြံဥာဏ်ကောင်းများကူးလူးစီးဆင်းနေဖို့ ကြားခံအရာများမရှိသင့်ပါ။အဆင့်များမကာဆီးထားသင့်ပါ။ အတားအဆီးများဖယ်ရှားပေးရပါမယ်။

စိတ်ပန်းကိုယ်ပန်းဖြစ်သည့်အခါများတွင် လူ့သဘာဝအရ တစ်ဦးထဲသီးသီးသန့်သန့်နေလိုကြတာကိုမေ့လျော့ထားလို့ မဖြစ်ပါဘူး။ဒါကြောင့်လုပ်ငန်းတွေမှာ ၀န်ထမ်းတွေ သီးခြားနားနေနိုင်ဖို့ကိုလည်းစီမံပေးရပါ့မယ်။ အနားယူပြီးလို့ စိတ်လက် အပန်းပြေကာအလုပ်စားပွဲတွင်ပြန်ထိုင်ပါကလုပ်ဖော်ကိုင်ဖက်များရဲ့ နွေးထွေးသောပြောဆိုဆက်ဆံမှုများကို ပြန်လည်ခံစားရမှာဖြစ်ပါတယ်။အကြံကောင်းဥာဏ်ကောင်းများလည်းလက်ခံလာရနိုင်ပါတယ်။Google ရဲ့ AdSense ဟာဒေါ်လာဘီလီယံချီပြီးငွေရှာပေးနေပါတယ်။ဒီထုတ်ကုန်တစ်ခုဟာစားရင်းသောက်ရင်းဆွေးနွေးကြရင်းဖြင့် တစ်နေ့ထဲအပြီးထုတ်လုပ်လိုက်တဲ့ ထုတ်ကုန်ပဲဖြစ်ပါတယ်။ အရောင်းသမားများ၊ဈေးကွက်ရှာဖွေရေးသမားများ၊ကြော်ငြာသမားများ၊အင်ဂျင်နီယာများ၊သိပ္ပံပညာရှင်များ၊လူမှုရေးပညာရှင်များ စားပွဲတစ်ဝိုင်းမှာ အတူထိုင်ပြီးစားသောက်ကြရင် အကြံစိတ်ကူးတစ်ခုကိုအပြန်ပြန်အလှန်လှန် ဝေဖန်ထောက်ပြကြရင်းနဲ့ ထွက်ပေါ်လာတဲ့ ထုတ်ကုန်တစ်ခုပါ။တစ်ဌာနနဲ့တစ်ဌာနတစ်ဦးနဲ့တစ်ဦးလေးစားကြောက်ရွံ့နေကြတဲ့ အဖွဲ့အစည်းတွေမှာထိုကဲ့သို့သောအကြံဥာဏ်မျိုး ဝေဖန်ဆွေးနွေးမှုမျိုး၊ ထောက်ပြအကျိုးပြုမှုမျိုးအကောင်အထည်ဖော်မှုမျိုး ကြားရ မြင်ရမည်မဟုတ်ပါ။လေးလံထိုင်းမှိုင်းနေပြီးတစ်ဦးကိုတစ်ဦးမျက်နှာရိပ် မျက်နှာကဲကြည့်နေရတာနဲ့တင် ၀န်ထမ်းဘ၀အချိန်များကို ကုန်ဆုံးစေခြင်းမဖြစ်သင့်ပါ။ထို့အတူစီးပွားရေးလုပ်ငန်းကျဆုံးရတာမျိုးမဖြစ်သင့်တော့ပါ။

ကျွန်တော့်သဘောအရဆိုရင် ဌာနမတူလုပ်ငန်းမတူဖြစ်စေဦးတော့ တစ်ဦးနဲ့တစ်ဦးလှမ်းမြင်နေရတဲ့နေရာမျိုး ပြည့်ကျပ်နေတဲ့ဝန်ထမ်းတွေနဲ့ဖွဲ့စည်းထားတဲ့ ရုံးခန်းမျိုးကိုပိုပြီးသဘောကျပါတယ်။စိတ်ကူးစိတ်သန်းတွေ ပျော်ရွှင်မှုတွေ ၀မ်းနည်းမှုတွေ မျှော်လင့်ခြင်းတွေ တစ်ဦးနဲ့တစ်ဦးကူးလူးစီးဆင်းနေစေချင်တာပါ။

 

မင်းနိုင်(ရွှေဘို)

Previous Next