23 Dec, 2018
“လက်အောက်ငယ်သားတွေရဲ့ လုပ်ငန်းစွမ်းဆောင်ရည်ကိုမြှင့်တင်ခြင်း”

ယနေ့ခေတ်ဟာနည်းပညာတွေအချိန်နဲ့အမျှပြောင်းလဲတိုးတက်နေသလိုစီးပွားရေးလုပ်ငန်းစုတွေအနေနဲ့လည်း ဈေးကွက်ဝေစုအတွက် ကြီးမားတဲ့ယှဉ်ပြိုင်မှုတွေ၊ ဆန်းသစ်တဲ့ဗျူဟာတွေနဲ့ ထိုးဖောက်လာကြတာကိုတွေ့မြင်ရပါတယ်။ နည်းပညာတွေ ပြောင်းလဲတိုးတက်တာမြန်လွန်းလို့ ဒီနေ့မှာအသုံးပြုလုပ်ဆောင်တဲ့နည်းစနစ်က အားလုံးရဲ့ရှေ့မှာပြေးနေမယ်ဆိုရင်တောင် သူ့ထက်ပိုမိုသာလွန်တဲ့နည်းလမ်းတွေ နောက်နေ့မှာထွက်ပေါ်လာနိုင်တာဖြစ်ပါတယ်။ တချို့နိုင်ငံကြီးတွေဟာကမ္ဘာအ၀ှမ်းမှာ နေ့စဉ်ထွက်ပေါ်လာတဲ့ နာမည်ကြီးထုတ်ကုန်တွေရဲ့ ဖန်တီးမှုအတတ်ပညာကို လေ့လာဆန်းစစ်တဲ့ သုတေသနအဖွဲ့တွေ သီးသန့်ရှိပါတယ်။ ဒီအဖွဲ့တွေရဲ့တွေ့ရှိချက်တွေကနေတဆင့် သူတို့နိုင်ငံအနေနဲ့ ထုတ်ကုန်တစ်ခုကို ထုတ်လုပ်ရာမှာ ဈေးကွက်ဝယ်လိုအားပေါ်မူတည်ပြီး တန်ဖိုးအနည်းဆုံးကနေ တန်ဖိုးကြီးမြင့်တဲ့ အနေအထားအထိ ပစ္စည်းတစ်မျိုးတည်းကိုပဲ Quality အမျိုးမျိုးနဲ့ ထုတ်လုပ်နိုင်ခဲ့ကြပါတယ်။

          ဒါကြောင့် လုပ်ငန်းစုတစ်ခုရေရှည်ရှင်သန်ဖွံ့ဖြိုးရေးအတွက် အရည်အသွေးပြည့်ဝတဲ့ဝန်ထမ်းတွေ၊ ဆန်းသစ်တဲ့နည်းစနစ်တွေ ထွက်ပေါ်လာဖို့အတွက် အမြဲတမ်းကြိုးစားအားထုတ်နေကြတဲ့ ပညာရှင်တွေ စတဲ့သူတွေရဲ့လုပ်ရည်ကိုင်ရည်က များစွာအခရာကျလာတဲ့အနေအထားမှာရှိနေပါတယ်။ကုမ္ပဏီရဲ့မန်နေဂျာအဆင့်ကစလို့ ဒါရိုက်တာအဖွဲ့ဝင်တွေ၊ CEO အဆင့်တွေအထိဒီအကြောင်းကိုနားလည်ထားဖို့လိုပါတယ်။ဒါပေမယ့် အဓိကအားဖြင့် မန်နေဂျာအဆင့်တွေကဒီကိစ္စနဲ့ပတ်သက်လို့ ပိုပြီးနားလည်သဘောပေါက်ထားဖို့ လိုပါလိမ့်မယ်။မိမိလက်အောက်ငယ်သားတွေရဲ့ အားနည်းချက်၊အားသာချက်တွေကို သိရှိနိုင်အောင်ကြိုးစားထားသင့်ပြီး သူတို့တွေရဲ့လုပ်ရည်ကိုင်ရည်ကို အစစ်အမှန်ဖြစ်လာအောင် ဖော်ထုတ်ပေးရမှာဖြစ်ပါတယ်။ တနည်းပြောရရင် အဖွဲ့အစည်းရဲ့ အောင်မြင်မှုဆိုတဲ့မီးပုံးပျံကြီး လှပစွာဝဲပျံလာရေးအတွက် ၀န်ထမ်းတွေရဲ့ Performance ဆိုတဲ့မီးစာကြိုးကို မီးရှို့ပေးလိုက်တာပါပဲ။ မှိုင်းဝဖို့နဲ့ လေသာတဲ့လမ်းကြောင်းရွေးချယ်ဖို့ကတော့ မန်နေဂျာတွေဖြစ်တဲ့ မိမိတို့အပေါ်မှာပဲမူတည်နေမှာဖြစ်ပါတယ်။ ဒီဆောင်းပါးမှာတော့ ၀န်ထမ်းတွေရဲ့ Performance တွေ တိုးတက်လာစေဖို့အတွက် မန်နေဂျာဖြစ်တဲ့သင့်အနေနဲ့ ဘာတွေကိုဦးစားပေး လုပ်ဆောင်သင့်သလဲဆိုတဲ့ အပိုင်းကိုဆွေးနွေးသွားချင်ပါတယ်။

(၁) Feedback ပေးပါ

          လက်အောက်ငယ်သားတွေရဲ့စွမ်းဆောင်ချက်အပေါ် အမြဲမပြတ်အကဲခတ်လေ့လာပြီး feedback ပေးတာမျိုးတွေ ပြုလုပ်သင့်ပါတယ်။အပြုသဘောဆောင်တဲ့ feedbackတွေက ၀န်ထမ်းတွေရဲ့စိတ်ကို အားတစ်ခုဖြစ်လာစေမှာပါ။ ဒါ့အပြင် ပတ်ဝန်းကျင်ကပေးတဲ့ feedback တွေကိုလည်းခံနိုင်ရည်ရှိအောင် သူတို့ရဲ့စိတ်တွေကို ပြင်ဆင်ပေးထားသင့်ပါတယ်။

(၂) ပန်းတိုင်ကိုပြသပေးခြင်းနှင့် အရည်အသွေးကိုတိုင်းတာစေခြင်း

ပန်းတိုင်ထားရှိခြင်းဆိုတာခရီးတစ်ခုကိုအစီအစဉ်ဆွဲပြီးသွားသလိုမျိုးပါပဲ။ဘယ်အချိန်မှာစထွက်မယ်။ဘယ်နေရာတွေကိုဖြတ်သန်းသွားရမယ်။လမ်းခရီးမှာဘယ်လိုရင်ဆိုင်ဖြတ်သန်းမယ်။ခရီးဆုံးနေရာကိုဘယ်နေ့ရောက်ရမယ် စသဖြင့် အစီအစဉ်ဆွဲပြီးသွားတာမို့ ဗရမ်းဗတာမဖြစ်တော့ပဲသက်တောင့်သက်တာနဲ့ဖြတ်ကျော်သွားနိုင်မှာဖြစ်ပါတယ်။

          ဒါကြောင့်လုပ်ငန်းခွင်ထဲမှာလည်းသင့်ရဲ့လက်အောက်ငယ်သားတွေကိုရည်ရွယ်ချက်ပန်းတိုင်ထားရှိလုပ်ဆောင် ကြဖို့ လမ်းပြပေးရမှာဖြစ်ပါတယ်။ဒါ့အပြင် ပန်းတိုင်ဆီသွားရောက်ရာမှာရှိသင့်ရှိထိုက်တဲ့အရည်အသွေးတွေကိုညွှန်ပြပေးဖို့ လည်းလိုပြီးမိမိကိုယ်ကိုဒီသတ်မှတ်ချက်တွေနဲ့အမြဲတမ်းတိုင်းတာနေကာလိုအပ်ချက်တွေကိုဖြည့်ဆည်းကြဖို့၊ပြည့်စုံနေတဲ့ သူဆိုရင်လည်း ၀ီရိယအားကိုလျော့မပစ်လိုက်ဖို့ သတိပေးနေရပါမယ်။

(၃) လိုအပ်ချက်တွေကို ပြုစုပျိုးထောင်ပေးခြင်း

          ဆရာဆိုတာဆောင်ရန်၊ဆောင်ရန်တွေကိုသာပြောပြနေရုံနဲ့ တာဝန်ကျေတယ်လို့မခေါ်ဆိုထိုက်ပါဘူး။မိမိရဲ့ လက်အောက်ငယ်သားတွေဟာဘယ်လိုစရိုက်မျိုးရှိတယ်ဆိုတာကိုနားလည်ထားဖို့လိုပြီးလိုအပ်ချက်တွေ၊တိမ်းစောင်းမှု တွေကိုတည့်မတ်လာအောင်ဖြည့်ဆည်းပေးရပါမယ်။

          လက်တွေ့ကျတဲ့သင်ကြားပြသပေးမှုမျိုးကမှတ်မိရပိုမိုလွယ်ကူစေပြီးဒါဟာလုပ်ငန်းစွမ်းဆောင်ရည်တိုးတက် ကောင်းမွန်လာစေဖို့အတွက် အထောက်အပံ့ကောင်းတစ်ခုလည်းဖြစ်စေမှာပါ။

(၄) ယှဉ်ပြိုင်တဲ့စိတ်မျိုးရှိလာစေခြင်း

          ဒီအချက်ကတိမ်မယောင်နဲ့နက်၊ လွယ်မယောင်နဲ့ခက်ပါတယ်။မတူညီတဲ့အခြေအနေတွေမှာလုပ်ကိုင်နေကြတဲ့ လက်အောက်ငယ်သားတွေကိုသူတို့ရဲ့ဖန်တီးလုပ်ဆောင်မှု၊၀ါယမစိုက်ထုတ်မှုနဲ့ အဖွဲ့အစည်းအတွက် အကျိုးအမြတ်များအောင်ပေးဆပ်နိုင်မှု၊ လမ်းညွှန်ချက်တွေကိုအကောင်းဆုံးအကောင်အထည်ဖော်လုပ်ဆောင်နိုင်မှု စတဲ့အချက်တွေနဲ့ ချိန်ထိုးပြီးအချင်းချင်းယှဉ်ပြိုင်စေတာမျိုးတွေလုပ်ပေးသင့်ပါတယ်။

          သူတို့ရဲ့ပေးဆပ်မှုအလိုက် ထိုက်တန်တဲ့ခံစားခွင့်တချို့နဲ့လည်း ပြန်လည်ချီးမြှောက်ပေးဖို့လိုပြီးယခုလိုယှဉ်ပြိုင်ခြင်းအပေါ်မှာဘယ်လိုစိတ်ခံစားချက်မျိုးတွေ၊ အာဃာတမျိုးတွေနဲ့မှ မလောင်မြိုက်စေဖို့ သတိပေဒပြောကြားသင့်ပါတယ်။ဘာ

ဖြစ်လို့လဲဆိုတော့ ဒီအချက်ကကိုင်တွယ်မတတ်ရင် မိမိရဲ့လက်အောက်ငယ်သားတွေကိုသွေးကွဲစေပြီးမလိုလားအပ်တဲ့ အခြေအနေတွေဖြစ်လာနိုင်လို့ပါပဲ။

(၅) အားကျဖွယ်ပုဂ္ဂိုလ်တွေရဲ့အကြောင်းကိုပြောပြပေးပါ

          ဒီအချက်ကမိမိရဲ့လက်အောင်ငယ်သားတွေကိုစိတ်ဓါတ်ခွန်အားကောင်းတွေဖြစ်စေပါတယ်။အလုပ်သိပ်မရှုပ်တဲ့ အားလပ်ချိန်တွေမှာကမ္ဘာပေါ်ကကျော်ကြားထင်ရှားပုဂ္ဂိုလ်များနဲ့ ကျော်ကြားလာတဲ့အခြေအနေရောက်အောင် သူတို့ရဲ့ ကြိုးစားအားထုတ်ခဲ့မှုတွေကို ပြန်လည်မျှဝေပေးသင့်ပါတယ်။

(၆) မွမ်းမံသင်တန်းတွေကိုကုမ္ပဏီရဲ့ငွေကြေးနဲ့စိုက်ထုတ်သင်ယူနိုင်အောင် ဖန်တီးပေးပါ

          လက်အောက်ငယ်သားတွေထဲကနေသင့်တော်ရာလူတွေကိုရွေးထုတ်ပြီးအလှည့်ကျစနစ်နဲ့ မွမ်းမံသင်တန်းတက် ရောက်စေတာမျိုးတွေလည်းလုပ်ပေးသင့်ပါတယ်။သင်တန်းကိုရုံးဆင်းချိန် ဒါမှမဟုတ် အလုပ်ပိတ်ရက်တွေမှာတက်ရောက် စေနိုင်ပါတယ်။ဒီအချက်ကသင့်အတွက် လက်အောက်ငယ်သားတွေကိုပြုစုပျိုးထောင်ပေးမှုမှာအထိုက်အလျောက်တော့ ၀န်ထုပ်ဝန်ပိုးတွေ လျော့ကျစေမှာပါ။

          ဒါပေမယ့် သင်တန်းတက်ရတဲ့ကုန်ကျစရိတ်ကိုတော့ ကုမ္ပဏီရဲ့ငွေကြေးနဲ့စိုက်ထုတ်သင်ကြားနိုင်အောင် သင့်အနေနဲ့ ကြိုးစားပေးဖို့လိုပါတယ်။

(၇) ဆုပေး၊ဒဏ်ပေးစနစ်

          လူတိုင်းဟာသူတို့ရဲ့ကြိုးစားအားထုတ်မှုအသီးအပွင့်တွေပေါ်မှာအသိအမှတ်ပြုမှုတွေလိုချင်တတ်ကြပါတယ်။ သင့်အနေနဲ့ဒါကိုကောင်းစွာသဘောပေါက်ထားဖို့လိုပြီးလက်အောက်ငယ်သားတွေရဲ့ကြိုးစားအားထုတ်မှုရလာဒ်တွေနဲ့ ပတ်သက်လို့ အသိအမှတ်ပြုမှုတွေလုပ်ပေးဖို့လိုပါတယ်။ဒါပေမယ့် အသိအမှတ်ပြုမှုကိုအမြဲတမ်းနှုတ်၏စောင်မခြင်းတစ်ခုတည်းနဲ့ မပြီးဆုံးသွားသင့်ပါဘူး။တခါတလေမှာသင့်တင့်လျောက်ပတ်မယ့် ချီးမြှောက်မှုလေးတွေလုပ်ပေးရင်းလက်အောက်ငယ်သားတွေရဲ့စိတ်ဓါတ်ကိုမြှင့်တင်ပေးဖို့လိုပါတယ်။

          တော်တဲ့သူကိုတော်ရင်တော်သလိုချီးမြှောက်ရမှာဖြစ်သလိုပျင်းရိတဲ့၊ကြိုးစားအားထုတ်မှုနည်းပါးတဲ့ဝန်ထမ်းတွေ ကိုလည်းသတိပေးဆုံးမတာမျိုးတွေနဲ့ လက်တွဲခေါ်လာခဲ့ရပါမယ်။သတိပေးထားလျှက်နဲ့ အကြိမ်ကြိမ်အမှားတွေကျူးလွန်တဲ့ သူဆိုလျှင်တော့ ဒဏ်ပေးတဲ့စနစ်ကိုပြုလုပ်ရမှာဖြစ်ပါတယ်။

(၈) အလုပ်တာဝန်ခွဲဝေပေးမှုနှင့် လုပ်ပိုင်ခွင့်အာဏာအပ်နှင်းမှု

          လုပ်နိုင်ရင်လုပ်နိုင်သလောက် လုပ်ပိုင်ခွင့်အာဏာအပ်နှင်းထားပြီးမိမိကဒီအပေါ်မှာပြန်လည်စီစစ်တာမျိုးတွေလုပ် ဆောင်သင့်ပါတယ်။အမြဲတမ်းမိမိရဲ့လောင်းရိပ်အောက်မှာပဲထားရင် လက်အောက်ငယ်သားတွေရဲ့လုပ်ငန်းစွမ်းဆောင်ရည် အပင်တွေကသန်မာထွားကျိုင်းလာမှာမဟုတ်ပါဘူး။

          ပထမဆုံးအတူတွဲလုပ်ခိုင်းရမယ်။အဆင်ပြေပြီဆိုရင် ဘယ်လိုလုပ်ဆိုတဲ့လမ်းညွှန်ချက်တွေပေးပြီးသူတို့ကိုယ်တိုင် ခရီးဆက်ခိုင်းရပါမယ်။ပွဲဦးထွက်မှာ မ၀ံ့မရဲဖြစ်နေတဲ့စိတ်လေးကရှိနေနိုင်တာမို့ ဒါကိုလည်း ပြင်ဆင်မောင်းထုတ်ပေးရပါမယ် ။ဒီလိုမျိုးတဖြည်းဖြည်းလေ့ကျင့်သင်ကြားပေးပြီးတဲ့အခါမှာတော့ သင့်လျော်တဲ့သူတွေကိုစုစည်းပေးပြီး အလုပ်တာဝန်တွေ ခွဲဝေပေးရပါမယ်။ဒီအထဲမှာသူ့အဆင့်နဲ့သူ တာဝန်ယူမှု၊တာဝန်ခံမှုရှိတဲ့အပေါ်မူတည်ပြီးလုပ်ပိုင်ခွင့်အာဏာတွေကိုအပ်နှင်းပေးလိုက်ပါ။ဒါပေမယ့် မိမိအနေနဲ့  အမြဲတမ်း Checking လုပ်နေဖို့တော့လိုပါလိမ့်မယ်။

(၉) သင်ယူလေ့လာစရာ၊ဆည်းကပ်စရာတွေကိုညွှန်ပြပေးတာ

          နည်းပညာတွေ၊ နည်းစနစ်တွေဟာအချိန်နဲ့အမျှတိုးတက်ပြောင်းလဲနေတာမို့ ဒါကိုမျက်ခြေပြတ်မခံပါမှ အများနဲ့ ရင်ဘောင်တန်းနိုင်တဲ့အဆင့်တစ်ခုမှာရပ်တည်နိုင်မှာပါ။သင့်အနေနဲ့လည်းလက်အောက်ငယ်သားအားလုံးကိုကိုယ်ဖိရင်ဖိနဲ့ အပြည့်အ၀သင်ကြားပေးဖို့အတွက် အချိန်တွေသိပ်ပေးနိုင်မှာမဟုတ်ပါဘူး။ဒါကြောင့် ဘယ်လိုအရာတွေကိုတော့လေ့လာဖို့လိုအပ်တယ်၊ အဲဒီအရာတွေကိုဘယ်သူ့ဆီမှာဒါမှမဟုတ် ဘယ်နေရာမှာလေ့လာနိုင်တယ်ဆိုတဲ့ source ကိုညွှန်ပြပေးတာမျိုးတွေလုပ်ရမှာပါ။သင့်ရဲ့လက်အောက်ငယ်သားတွေအနေနဲ့ သင့်ရဲ့လမ်းညွှန်မှုကိုလိုက်နာလေ့လာပြီးသူတို့မရှင်းလင်းတာတွေကိုမေးမြန်းတင်ပြလာတဲ့အခါ ပြန်လည်ရှင်းလင်းပြောပြပေးသင့်ပါတယ်။

(၁၀) အချိန်ကာလနဲ့လျော်ညီနဲ့ ပျော်ပွဲရွှင်ပွဲတွေစီစဉ်ပေးပါ

          လက်အောက်ငယ်သားတွေအနေနဲ့ အလုပ်လုပ်ရာမှာပျော်ရွှင်တက်ကြွစွာဖြစ်နေစေဖို့အတွက် သင်ဖန်တီးပေးသင့် တဲ့အရာတွေထဲမှာပျော်ပွဲရွှင်ပွဲတွေ၊ နှစ်ပတ်လည်ပါတီပွဲတွေကျင်းပပြုလုပ်စေပြီးအားလုံးပျော်ရွှင်စွာပါဝင်ဆင်နွှဲစေတာမျိုးတွေလည်းလုပ်ပေးသင့်ပါတယ်။ဒီအချက်ကလက်အောက်ငယ်သားတွေရဲ့လုပ်ငန်းစွမ်းဆောင်ရည်ကိုသာမကပဲအချင်းချင်းချစ်ခင်ရင်းနှီးစွာနဲ့ ဖေးဖေးမမလက်တွဲလုပ်ကိုင်နိုင်စေဖို့အတွက်ကိုလည်းအထောက်အကူဖြစ်စေမှာပါ။

          အချို့ကုမ္ပဏီတွေကဒီလိုပျော်ပွဲရွှင်ပွဲတွေအပြင် အပန်းဖြေခရီးပို့ဆောင်ပေးတာမျိုးလည်းလုပ်ပေးတတ်ကြပါတယ်။

  အထက်ပါအချက်တွေကတော့ မန်နေဂျာဖြစ်တဲ့အကြီးအကဲတစ်ယောက်အနေနဲ့ မိမိလက်အောက်ငယ်သားတွေရဲ့ လုပ်ငန်းစွမ်းဆောင်ရည်ကိုမြှင့်တင်ပေးရာမှာလိုက်နာလုပ်ဆောင်သင့်တဲ့အခြေခံကျတဲ့အချက်တွေပဲဖြစ်ပါတယ်။မျှတစွာကြည့်ရှုစောင်မပေးတတ်တဲ့ အထက်လူကြီးတွေရှိတဲ့နေရာမှာ လက်အောက်ငယ်သားဝန်ထမ်းတွေကလည်း ပျော်ရွှင်တက်ကြွစွာနဲ့ပေးဆပ်ဖို့အသင့်ရှိနေတယ်ဆိုရင် အားလုံးလက်ခံကြမယ်ထင်ပါတယ်။

 

ရာသက်ပန်

(သစ္စာပန်းတို့လန်းရာမြေ)         

Previous Next