07 Jan, 2019
အလုပ်ရှင်က ပြန်လည်လေးစားရသော အလုပ်သမားဝန်ထမ်းများ

လူမှုကွန်ရက်တစ်ခုမှာအလုပ်ရှင်ကပြန်ပြီးအောက်ကျို့ရတဲ့ အလုပ်သမားဝန်ထမ်းများရှိပါသလားဆိုပြီး အမေးတစ်ခုလက်ခံရရှိပါတယ်။ အောက်ကျို့ဆိုတဲ့စကားကအနည်းငယ်ဒေါသသင့်တာကြောင့် ပြန်လှန်လေးစားဆိုတဲ့စကားကိုအသုံးပြုပြီးရေးသားဖြေဆိုလိုက်ရပါတယ်။

လူဖြစ်လာကတည်းကလေးစားခြင်းခံလိုကြတာဓမ္မတာပါ။ ကြီးကြီးငယ်ငယ် ရာထူးအဆင့်အတန်းကွာခြားစေကာမူ၊ ငွေကြေးချမ်းသာမှုကွာခြားနေကြစေကာမူအပြန်အလှန်လေးစားခံချင်ကြတာပါ။တရားမျှတပါတယ်။

အမှန်တရားမြတ်နိုးသူ၊ ဖြူစင်ဖြောင့်မတ်သူ ၊စွန့်လွှတ်အနစ်နာခံသူ၊သီလသမာဓိရှိသူ ၊တရားရှိသူအစရှိသူတွေကတော့ လူအများရဲ့ လေးစားချစ်ခင်မှု ရရှိကြပါတယ်။လေးစားတာနဲ့အမျှ သူ့တို့စကားသူတို့အပြုအမူသူတို့လမ်းညွှန်ချက်များဟာ လိုက်ပါလုပ်ဆောင်စရာများဖြစ်လာကြပါတော့တယ်။ခေါင်းဆောင်ကောင်းတွေလည်းဖြစ်လာကြပါတယ်။

မိမိတတ်ကျွမ်းသည့်ပညာဖြင့် အသက်မွေးဝမ်းကြောင်းပြုရသော ၀န်ထမ်းများတွင်လည်း အလုပ်ခွင်တွင် အလုပ်ရှင်နှင့်ယှဉ်လျှင် ဆုံးဖြတ်ပိုင်ခွင့်နည်းပါးပြီး တာဝန်ပေးစေခိုင်းတာကိုသာ ပြီးပြတ်အောင်လုပ်ဆောင်ပေးရစေကာမူအလုပ်ရှင်မှ တန်ဘိုးထား ပြန်လည်လေးစားရသော ၀န်ထမ်းများရှိပါတယ်။၎င်းတို့ကို အောက်ပါအတိုင်းအမျိုးအစားအကြမ်းဖျဉ်းခွဲခြားနိုင်ပါတယ်။

(၁)အလုပ်တာဝန်ကျေပွန်သော ၀န်ထမ်းကောင်းများ

ပေးအပ်သောတာဝန်ကို ကျေပွန်အောင် အကောင်းဆုံးလုပ်ဆောင်ကြသည့်အပြင် နောက်ထပ် ဘာတာဝန်ပေးမည်ကို အဆင်သင့်စောင့်နေသောဝန်ထမ်းမျိုးဖြစ်တယ်။မသိမတတ် နားမလည်လျှင် မသိမတတ် နားမလည်ကြောင်းပွင့်လင်းစွာပြောဆိုတတ်ပြီးလိုအပ်သောသွန်သင်ဆုံးမမှုများခံယူကာ တာဝန်ကိုထမ်းဆောင်တတ်သူဖြစ်တယ်။ပိုသိပိုတတ်လာအောင် အဆက်မပြတ်သင်ယူလေ့လာနေသူတွေဖြစ်တယ်။အလုပ်လုပ်ပြီဆိုရင်လဲ ဖြစ်ကတတ်ဆန်းဆောင်ရွက်တတ်သူမဟုတ်ပဲ Work Quality ကိုဦးစားပေးတယ်။Finished ဆိုသောစကားထက် Achieved ဆိုသောစကားကို မြတ်နိုးသူဖြစ်တယ်။ရပိုင်ခွင့်ထက် လုပ်ပိုင်ခွင့်ကိုမျှော်ကိုးတယ်။ အပေးအယူမျှအောင်နေတယ်။ရံဖန် အပေးကိုသာဦးစားပေးတတ်တယ်။အဲလိုဝန်ထမ်းမျိုးကိုအလုပ်ရှင်များကအမြတ်တနိုးတန်ဖိုးထားတတ်ကြတယ်။ လေးစားကြသည်။အလုပ်မှ နှုတ်ထွက်သွားမှာကိုအလွန်ပင်စိုးရိမ်ကြတယ်။

(၂) ရေရှည်မျှော်မှန်းနိုင်ပြီး မူဝါဒကောင်းကောင်းချမှတ်ပေးနိုင်သောဝန်ထမ်းများ

ပညာရှင်ပိုင်းမှာပါဝင်တယ်။လုပ်ငန်းအတွေ့အကြုံများတယ်။အကောင်းအဆိုးကို ဆင်ခြင်သုံးသပ်နိုင်စွမ်းမြင့်သည်သာမကလုပ်ငန်းအောင်မြင်ရေး၊ရေရှည်ရပ်တည်နိုင်ရေးအတွက် ကြိုတင်တွက်ဆတတ်သူဖြစ်တယ်။ ရေရှည်စီမံကိန်းများ၊ဗျူဟာများကိုချမှတ်ရာတွင် ကူညီဆောင်ရွက်ပေးတတ်သူဖြစ်တယ်။အမှားကို တာဝန်ယူနိုင်စွမ်းမြင့်တယ်။မဟာဗျူဟာနည်းဗျူဟာများ၏ အားနည်းချက်များကိုကောင်းစွာသိမြင်နိုင်ပြီး တာဝန်ယူပြုပြင်ပေးတတ်သူဖြစ်တယ်။လုပ်ငန်ရှင်အတွက် ၀န်ထမ်းအဖြစ်သာမကပဲ လုပ်ဖော်ကိုင်ဖက် အကြံပေးအဖြစ်ပါတာဝန်ယူဆောင်ရွက်ပေးတယ်။ထိုဝန်ထမ်းများကို အလုပ်ရှင်ကအလွန်ပင်တန်ဘိုးထားတယ်။

(၃) သစ္စာစောင့်သိသောဝန်ထမ်းများ

လုပ်ငန်းစတင်စဉ်ကတည်းက အတူပါလာတတ်တယ်။ကျရှုံးနေသည်ဖြစ်စေ၊ရပ်တန့်နေသည်ဖြစ်စေ၊အောင်မြင်လာသည်ဖြစ်စေ အလုပ်ရှင်အပေါ်သစ္စာစောင့်သိပြီးအလုပ်မှ မခွဲခွာသူဖြစ်တယ်။လုပ်ငန်းကျွမ်းကျင်မှု ကြိုတင်မျှော်မှန်းနိုင်မှု တာဝန်ယူနိုင်မှု အားနည်နေနိုင်သော်လည်းမည်သည့်အခါမျှ အလုပ်ရှင်မကောင်းကြောင်းမပြော၊အလုပ်ရှင်ထိခိုက်အောင်မလုပ်၊အလုပ်ရှင် အကျိုးပျက်စီးရာပျက်စီးကြောင်းဘယ်သောအခါမှမလုပ်။ ဟန်ဆောင်ဝမ်းနည်းခြင်းမရှိ။ဟန်ဆောင်ဝမ်းသာခြင်းမရှိ၊ အလုပ်ရှင်နှင့်အတူခရီးရှည်ဖြတ်သန်းသူများဖြစ်တယ်။အဲလိုဝန်ထမ်းမျိုးတွေကိုလည်းအလုပ်ရှင်ကသက်ဆုံးတိုင်လက်တွဲသွားတတ်တယ်။

(၄) အလုပ်ရှင်၏အားနည်းချက်ကိုသိရှိပြီးအလုပ်ရှင်အား ထိန်းကျောင်းနိုင်သောဝန်ထမ်းများ

အချို့သောဝန်ထမ်းများသည် အလုပ်ရှင်နှင့်တရင်းတနှီးနေတတ်ကြတယ်။အလုပ်ရှင်၏အားနည်းချက်များကိုလည်း ခရေစေ့တွင်းကျ သိထားကြတယ်။ကိုယ်ကျင့်တရားပျက်ယွင်းနေမှုများ၊လူမှုရေးဖောက်ဖျက်မှုများ၊စည်းကမ်းဖောက်ဖျက်မှုများ၊အခွန်အခဆိုင်ရာ မသမာမှုများ၊ ကျင့်ဝတ်မလိုက်နာမှုများကိုအတွင်းကျကျသိရှိနားလည်ထားကြတယ်။ဒါပေမယ့် အလုပ်ရှင်ကိုအကြပ်ကိုင်ခြင်း၊ ငွေညှစ်ခြင်း၊အရှက်ခွဲခြင်း၊ အခွင့်အရေးတောင်းဆိုခြင်းအစရှိတာမျိုးတွေ မပြုပဲအလွန်ပင် ရင့်ကျက်စွာဖြင့် ဖြေရှင်းဆောင်ရွက်တတ်သူ ဖြစ်တယ်။ အလုပ်ရှင်၏အမှားကို လျှို့ဝှက်ပေးထားတတ်ပြီးအကောင်းဖက်သို့ ပြန်လည်ရောက်ရှိလာအောင် လုပ်ဆောင်ပေးတတ်သောလမ်းကြောင်းပြန်တည့်ပေးတတ်သော ၀န်ထမ်းမျိုးဖြစ်တယ်။အလုပ်ရှင်နဲ့ အလုပ်ရဲ့အတွင်းရေးဟူသမျှကိုသိရှိထားပြီးအသက်ပေးပြီးကာကွယ်စောင့်ရှောက်တတ်တယ်။အမှားအယွင်းအကြီးကြီးဖြစ်ပွားခဲ့တာကိုသူနှင့်အလုပ်ရှင်သာလျှင်သိကြတယ်။ အကောင်းဆုံးဖြေရှင်းပြီးမှသာကျန်သူများသိရနိုင်သည်အထိစေ့စပ်သေချာစွာဆောင်ရွက်တတ်သူဖြစ်လို့ အလုပ်ရှင်မှ လက်မလွှတ်နိုင်ဖြစ်ကြရတယ်။ ထိုဝန်ထမ်းမျိုးသည် အလုပ်ရှင်၏ အုပ်ထိန်းသူနေရာတွင် နေရသည့်အပြင် အလုပ်ကိုတကယ်ကျွမ်းကျင်ကြသူများဖြစ်ကြတယ်။ ပေါင်းသင်ဆက်ဆံရေးကောင်းမွန်ပြီး ၀န်ထမ်းများစွာ၏ ချစ်ခင်လေးစားမှုကိုရရှိပိုင်ဆိုင်သူများဖြစ်ကြတယ်။

(၅) ကိုယ်ကျင့်တရားကောင်းမွန်သော ၀န်ထမ်းများ

ရိုးသားသော ၀န်ထမ်းများဖြစ်တယ်။အလုပ်ရှင်၏ ပစ္စည်း၊ငွေ၊အချိန် မည်သည့်အရာတစ်ခုခုကိုမျှ အလွဲသုံးစားမပြုတဲ့ ၀န်ထမ်းများလည်းဖြစ်ကြတယ်။ရိုးသားခြင်းနှင့် ရိုးအခြင်းတို့ဟာအလွန်ပင်ခြားနားတယ် ၊ဆင်တူရိုးမှားတောင်မဟုတ်။ရိုးသားခြင်းသည် ချစ်မြတ်နိုးဘွယ် ကောင်းလွန်းသလောက် ရိုးအခြင်းသည် စိတ်ပျက်ဖွယ်ရာကောင်းလှသည်။ရိုးသားခြင်းတွင် ရိုးအခြင်းလုံးဝအရောမပါ။ပေးသည်ကိုသာယူတယ်။ပေးသည်ထက် ပိုပြီးတန်သောတုန့်ပြန်မှုကိုပြုတယ်။စေတနာအပြည့်ထည့်တယ်။ထာဝရဆိုသော စကားကိုအလေးထားတယ်။တင့်တိမ်ရောင့်ရဲတတ်တယ်။အကျိုးအကြောင်းမလျော်သောမည်သည့်အပြုအမှုမျှ မလုပ်။ကိုယ်နှုတ်စိတ် သုံးပါးလုံးကောင်းစွာထိန်းချုပ်နိုင်သူများဖြစ်တယ်။ထိုဝန်ထမ်းမျိုးကိုလည်းအလုပ်ရှင်ကအလေးအမြတ်ပြုတယ်။

အလုပ်ရှင်သည် ငွေရှင်ကြေးရှင်ဖြစ်သည့်အပြင် ဆုံးဖြတ်ပိုင်ခွင့်အပြည့်ရှိသူဖြစ်တယ်။ဥပဒေမှ မည်သို့ပင်ဆိုစေကာမူဥပဒေထဲတွင် ထည့်သွင်းမကန့်သတ်နိုင်သောအချက်များကိုအလုပ်ရှင်မှ ကောင်းစွာကျော်ဖြတ်နိုင်တယ်။ကျော်လွှားပိုင်ခွင့်လည်းရှိတယ်။ မိမိအလုပ်ငန်းတွက်သင့်တော်သူကို ၀န်ထမ်းအဖြစ် အလုပ်ခန့်ပိုင်ခွင့်ရှိသလိုအလုပ်ထုတ်ပိုင်ခွင့်ရှိတယ်။အပြစ်ပေးအရေးယူခွင့်ရှိသလိုချီးမြှင့်မြှောက်စားပိုင်ခွင့်ရှိတယ်။ ဥပေက္ခာပြုခွင့်ရှိသလိုအရေးယူဆောင်ရွက်ပိုင်ခွင့်လည်းရှိတယ်။ရှင်းရှင်းဆိုရသော် အလုပ်ရှင်ဟာအလုပ်ခွင်တွင် ဘုရင်တစ်ပါးပင်ဖြစ်တယ်။အလုပ်သမားတွေဟာအသိပညာအတတ်ပညာမည်မျှပင်ရှိစေကာမူအလုပ်ရှင်၏ အဆုံးအဖြတ်ကိုလိုက်နာကြရတယ်။ အလုပ်သမားဝန်ထမ်းဟာအကြောင်းအရာတစ်ခုခုနှင့်ပတ်သက်ပြီးတော့ ဒါမှမဟုတ် ဆုံးဖြတ်ချက်တစ်ခုခုနှင့်ပတ်သက်ပြီးတော့အလုပ်ရှင်အားတရားမျှတမှု မရှိဟုတင်ပြပြောဆိုခွင့်ရှိသော်လည်းအများအားဖြင့် အလုပ်ရှင်၏ အဆုံးအဖြတ်ကိုလိုက်နာကြရတယ်။

သို့သော် အလုပ်ရှင်သည်လည်းလူသားတစ်ဦးဖြစ်ခြင်းကြောင့် သူ့အကျိုးစီးပွား၊စိတ်၊ကိုယ် တစ်ခုခုကိုအကာအကွယ်ပြုပေးနိုင်သော၊ကူညီဖေးမပေးနိုင်သော၊ရပ်တည်ပေးနိုင်သော ၀န်ထမ်းများကို လေးစားချစ်ခင်တတ်ကြပါတယ်။တန်ဘိုးထားကြပါတယ်။ ရေရှည်လက်တွဲကြတယ်။ဝန်ထမ်းကောင်းများကို လက်လွှတ်စပယ် အလုပ်ထုတ်ပြစ်ခဲ့သောကြောင့် ၀မ်းနည်းကြေကွဲရသော အလုပ်ရှင်များရှိပါတယ်။နောင်တရနေသောအလုပ်ရှင်များရှိပါတယ်။အချို့သောအလုပ်ရှင်များဟာငကန်းသေရင် ငစွေလာလိမ့်မည်ဟုအတိအလင်းကြေညာထားလင့်ကစားရင်ထဲတွင်တော့ အမှတ်ထင်ထင် ရှိနေသော ၀န်ထမ်းကောင်းများရှိပါတယ်။အဲလိုဝန်ထမ်းတို့ကို အားကိုးသလိုယုံကြည်တယ်။ဒါကြောင့် အလုပ်ခွင်ထဲမှာဖြစ်နိုင်ရင် အမြဲထာဝရ တာဝန်ပေးထားချင်ကြပါတယ်။

အဲလိုပဲအထက်ဖော်ပြပါအချက်များနှင့်ဆန့်ကျင်ဖက်ဖြစ်သူများဟာအလုပ်ခွင်တွင် အဆင်မပြေမူများစွာဖြင့် စောစီးစွာထွက်ခွာသွား ကြရသော ၀န်ထမ်းမျိုးများဖြစ်ကြတယ်။အနေအထိုင်မတတ်တော့ မိမိကြိုက်နှစ်သက်သောအလုပ်၊မိမိမျှော်မှန်းထားသောအလုပ်ခွင်ဖြစ်စေဦးတော့ နှုတ်ဆက်စကားစောစောစီးစီးပြောရတတ်တယ်။ဒါကြောင့် ၀န်ထမ်းတွေဟာ အလုပ်ကောင်းတစ်ခုရဖို့အလုပ်ပိုင်းဆိုင်ရာ ကျွမ်းကျင်နှံ့စပ်ရုံနဲ့ မရတော့ဘူး။ ပေါင်းသင်းဆက်ဆံရေး၊ အခြေအနေအချိန်အခါ ကြည့်တတ်ရေး၊အလိုက်သိနားလည်တတ်ရေး၊အနေအထိုင်တတ်ရေးအစရှိတဲ့ အဌာရဿများကိုလည်း ကျွမ်းကျင်နေဖို့လိုပါတယ်။

အလုပ်ရှင်သည် အလုပ်သမားဝန်ထမ်း၏ ပြိုင်ဖက်မဟုတ်ပါ။ရန်သူမဟုတ်ပါ။ သူ့အကျိုးကိုယ့်အကျိုးအပြန်အလှန်မှီတည်နေသောမိတ်ဆွေစစ်စစ်သာလျှင်ဖြစ်ပါတယ်။မိတ်ဆွေများနှင့် ရေရှည်လက်တွဲနိုင်အောင် ကြိုးစားသင့်လှပါတယ်။

အလုပ်ရှင်က ပြန်လည်လေးစားတန်ဘိုးထားခံရသော ၀န်ထမ်းမျိုးဖြစ်ကြပါစေ။

မင်းနိုင် (ရွှေဘို)

Previous Next