25 Mar, 2019
ကျွန်တော်သိတဲ့ Content Writer ဆိုတာ

“မင်းတို့ Content Writer အလုပ်ကသာယာပါတယ်ကွာ။ အေးအေးဆေးဆေးထိုင်ပြီးစာလေးရေးနေရုံနဲ့ ပိုက်ဆံရတာ”လို့ ပြောလာတဲ့သူဆိုရင် အမြတ်ကတ်မိပါတယ်။ ခဏခဏလည်းအဲ့လိုပြောခံခဲ့ရဖူးပါတယ်။ “မင်းတို့လည်းစာရေးတတ်တာပဲလေကွာ။ ရေးကြပါလား”ဆိုတဲ့ စကားတစ်ခွန်းပဲ ကျွန်တော်ပြန်ပြောလေ့ရှိပါတယ်။တကယ်တော့ စာရေးတဲ့အလုပ်ကိုသူတို့နားမလည်လို့ ပြောကြတာလို့ပဲယူဆပါတယ်။

တကယ်တော့ Digital Marketing တွေခေတ်စားလာတဲ့ အချိန်ရောက်မှ Content Writer အမည်စတင်ပေါ်ပေါက်လာတာ ပါ။ အခုအချိန်အထိ Content Writer ဆိုတာဘာလုပ်တဲ့ ရာထူးလဲဆိုတာအနီးစပ်ဆုံးမီဒီယာကလူတွေတောင် သိတဲ့သူရှိသလိုမသိတဲ့သူတွေတောင် ရှိနေပါသေးတယ်။ အရင်တုန်းက ကျွန်တော်ကိုယ်တိုင်တောင် Content Writer ဆိုတာဘာမှန်းမသိခဲ့ပါဘူး။ မီဒီယာလောကမှာလေးငါးနှစ်ဖြတ်သန်းလာတယ်။ သတင်းရေးတာ၊ ဆောင်းပါးရေးတာစတဲ့မီဒီယာကျင့်ဝတ်နဲ့သက်ဆိုင်တဲ့သင်တန်းတွေတက်ပြီးလေ့လာခဲ့တာ။ Content Writer တစ်ယောက်ရဲ့ အရေးအသားအတွေးအခေါ်မျိုးတစ်ခါမှစိတ်မကူးမိခဲ့ပါဘူး။ Content Writer လောကထဲရောက်လာမှသာသိသင့်သလောက် သိလာခဲ့ရတာလို့ ဆိုရမှာပါ။

ခုနောက်ပိုင်း၊ ဂျာနယ်တွေ၊ Facebook Page တွေမှာ Content Writer ရာထူးနဲ့အလုပ်ခေါ်တာတွေ တော်တော်များများမြင် တွေ့လာရသလိုအတွေ့အကြုံရှိတဲ့သူတွေကိုပဲဦးစားပေးခေါ်တာမျိုးလည်းတွေ့ရပါတယ်။ အချို့ကလည်းစာအရေးအသားကောင်းတဲ့သူ၊ အင်္ဂလိပ်လိုပြောတတ်တဲ့သူ၊ Facebook Page တွေကို ကျွမ်းကျွမ်းကျင်ကျင်ကိုင်တွယ်တတ်တဲ့သူတွေ၊ Digital Marketing သင်တန်းဆင်းပြီး Content ရေးသားနိုင်တဲ့သူတွေကိုပဲအလုပ်ခေါ်နေတာမျိုးတွေလည်းတွေ့ရတတ်ပါ တယ်။ အဓိကကတော့ မြန်မာလို လူအများစိတ်ဝင်စားနိုင်အောင် ရေးသားနိုင်သူ၊ စာအရေးအသားကောင်းသူကိုသာဦးစားပေးရွေးချယ်ခေါ်ယူတတ်ကြပါတယ်။

Content Writer တစ်ယောက်ဖြစ်ဖို့ဘာတွေလုပ်သင့်သလဲ။

အချို့အသိမိတ်ဆွေတွေကပြောကြပါတယ်။ “ကျွန်တော်လည်း Content Writer တစ်ယောက်ဖြစ်ချင်တယ်။ စာရေးရတာ လည်းအရမ်းဝါသနာပါပါတယ်။ အဲ့ဒီလိုဖြစ်ဖို့အတွက် ဘာတွေလိုမလဲ။ ဘာတွေလုပ်ရမလဲ”ဆိုပြီးမေးလာတာမျိုးတွေပါပဲ။ အ ရင်ဆုံးကျွန်တော်သိသလောက်ပြောချင်တာကစာရေးတယ်ဆိုတာကလည်းအနုပညာအလုပ်တစ်ခုဖြစ်တဲ့အတွက် စိတ် အေးအေးချမ်းချမ်းနဲ့ စာရေးတာ၊ စာဖတ်တာစတဲ့အလေ့အကျင့်တွေ အရင်ဆုံးလုပ်ဖို့လိုပါတယ်။ Facebook၊ Twitter၊ Website စတဲ့နေရာတွေမှာသူများတွေကအကြောင်းအရာတစ်ခုခုကို စိတ်ဝင်စားအောင်၊ ဆွဲဆောင်မှုရှိအောင်ဘယ်လိုရေးသားကြသလဲဆိုတာလည်းလေ့လာမှတ်သားရပါမယ်။ ဘယ်နေရာမှာဖြင့် ဘယ်လိုစပြီးလူစိတ်ဝင်စားအောင်ရေးတယ်။ ဘယ်လိုနိဂုံးချုပ်ထားတယ်ဆိုတဲ့ အသေးစိတ်ကလိုက်ကြည့်ရမှာပါ။ (ပြန်လည်ကူးယူဖို့မဟုတ်ပါဘူး)။

Digital Marketing သင်တန်းတက်ထားဖူးလို့ Content Writer အယူအဆတွေ၊ လုပ်ထုံးလုပ်နည်းတွေကိုသိထားတယ်ဆိုရင်တောင်မှဗဟုသုတနဲ့လေ့လာမှုအပိုင်းကကုန်သွားတယ်လို့မရှိတဲ့အတွက် စာတွေရေးဖို့ ဆက်လက်လေ့လာရအုံးမှာပါပဲ။ Content Writer မှာလည်းတက္ကသိုလ်တုန်းကကျောင်းတက်ရသလိုသူ့မေဂျာသူနဲ့သူဆိုပြီးရှိပြန်ပါတယ်။ ခရီးသွား Content ကိုရေးတဲ့သူ၊ အလှအပဆိုင်ရာကိုရေးတဲ့သူ၊ IT ပိုင်းဆိုင်ရာရေးတဲ့သူစသဖြင့် အမျိုးမျိုးရှိနေပြန်တော့ ဘယ်အရာကိုမှ ကိုယ်နဲ့မဆိုင်ဘူးရယ်လို့အမှုမဲ့အမှတ်မဲ့ နေလို့မရပြန်ပါဘူး။ အားလုံးကိုလေ့လာရမှာပါ။

လုပ်ငန်းခွင်တစ်ခုနဲ့တစ်ခုကလည်းလုပ်ငန်းခွင်အကြောင်းအရာခြင်းမတူညီကြတဲ့အတွက်အလုပ်အပ်နှံသူဘက်ကသူတို့နဲ့ သက်ဆိုင်တဲ့ Content မျိုးကိုရေးပေးနိုင်တဲ့သူ၊ နားလည်တဲ့လူကိုသာဦးစားပေးရွေးခေါ်ကြမှာပါပဲ။ အဲ့ဒါကြောင့် ကိုယ်ကအကြောင်းအရာအကုန်မဟုတ်တောင် တော်တော်များများရေးတတ်ထားတော့ အဆင်ပြေသွားတာမျိုးလည်းရှိတတ်ပါတယ်။

နောက်ထပ်အရေးကြီးတာတစ်ခုကအင်္ဂလိပ်စာအရည်အချင်းပါ။ Content Writer တစ်ယောက်မှာ မြန်မာစာအရေးအသားဘယ်လောက်ပဲတော်နေသူဖြစ်ပါစေ။ အင်္ဂလိပ်စာကိုလည်းပိုမိုနားလည်အောင်လေ့လာထားဖို့ လိုပါတယ်။ အင်္ဂလိပ်လိုအရမ်းတော်လှပါပြီမဟုတ်တောင် ထိုက်သင့်သလောက်တော့ သိထားမှဖြစ်မှာပါ။ အနည်းဆုံး မြန်မာလိုကနေအင်္ဂလိပ်လိုပြန် မရေးနိုင်ဘူးဆိုရင်တောင် အင်္ဂလိပ်စာကို မြန်မာဘာသာအနည်းအကျဉ်းလောက်တော့ ပြန်တတ်ဖို့လိုပါတယ်။ ဒါကတော့ တစ်ယောက်ခြင်းစီမှာရှိတဲ့ အားနည်းချက်ဖြစ်တဲ့အတွက်ကြောင့် အားလုံးကို ခြုံမပြောလိုပါဘူး။အင်္ဂလိပ်စာကိုအဖက်ဖက် ကကျွမ်းကျင်ထားရင်တော့ အကောင်းဆုံးပါပဲ။မကျွမ်းကျင်တဲ့သူတွေအတွက်လည်းသင်တန်းတွေတက်ပြီး ပြန်လေ့လာလို့ အဆင်ပြေသွားတာမျိုးလည်းရှိပြန်ပါတယ်။အင်္ဂလိပ်စာဘာကြောင့်သိထားဖို့လိုလဲဆိုတော့ အချို့နေရာတွေက Copy Writer လုပ်ပြီး ပြန်ရေးရတဲ့အခါမျိုးတွေမှာအခက်အခဲမရှိအောင်လို့ပါပဲ။

ခုနောက်ပိုင်းခေါ်တဲ့အလုပ်တွေမှာ Content Writer နဲ့ Digital Marketing ဆိုတဲ့ရာထူးကိုတစ်ခါတည်းတွဲပြီးခေါ်တာမျိုးရှိသလို Content Writer အလုပ်ကိုပဲခွဲခြားပြီးခေါ်တာလည်းတွေ့ရပါတယ်။ ဘာပဲပြောပြော Content Writer တစ်ယောက် ဖြစ်နေရင်တော့ Page မှာစာတင်တာတွေ၊ Page ကိုယ်တွယ်နည်းတွေ သိထားရင်လည်းပိုအဆင်ပြေသွားပြန်ပါတယ်။

Content Writer လောကထဲဝင်ဖို့ စာတွေကို ကြိုးစားရေးပြီးအလုပ်ရှာနေတဲ့သူတွေလည်းရှိပြန်ပါတယ်။ ကိုယ်ရေးထားတဲ့ Content ကိုကိုယ်ပိုင် Page (သို့) ကိုယ်ပိုင် Account တွေမှာတင်ပြီး ပြန်လည်မျှဝေတာမျိုး၊ Content Writer Freelance  အလုပ်တွေမှာနမူနာပြပြီးပေးပို့လျှောက်ထားတာတွေလည်းရှိပါတယ်။ အဲ့ဒီထဲမှာအောင်မြင်ပြီး Content Writer ရာထူးနဲ့ အလုပ်ဝင်တဲ့သူတွေရှိသလို တချို့ကလည်းအရေးအသားအတွေးအခေါ်ကောင်းတွေရှိပါလျှက်နဲ့ အလုပ်မရသေးတဲ့သူတွေ လည်းရှိနေပါသေးတယ်။ အဲ့ဒါကလည်းအားငယ်နေစရာမလိုပါဘူး။ ခရီးများများသွားဖူးတဲ့သူကခရီးသွား Content တွေကိုရေးရတာပိုကျွမ်းသလို၊ ဖက်ရှင်ပိုင်းဝါသနာပါတဲ့သူတွေက ဖက်ရှင်ပိုင်း Content တွေကိုရေးရတာပိုကျွမ်းကျင်ကြမှာပါပဲ။ အဲ့ ဒီတော့ ကိုယ်အဆင်ပြေတဲ့ Content တွေများများရေးပြီး ပြန်လည်ဖြန့်ဝေတာ၊ နမူနာပြပြီးအလုပ်လျှောက်တာတွေက Content Writer လောကထဲဝင်လာဖို့ အခွင့်အရေးတစ်ခုဖြစ်လာမှာအသေချာဆုံးပါပဲ။

Content Writer တစ်ယောက်ရဲ့ပြနာတွေကဘာတွေဖြစ်မလဲ။

Content Writer လောကမှာ Creative ကောင်းဖို့ဆိုတာကလည်းကိုယ်ပိုင်ဥာဏ်နဲ့တွေးခေါ်မှုကအဓိကကျပါတယ်။ဥပမာဟာသဥာဏ်အရမ်းကွန့်မြူးတဲ့သူတွေအတွက် ဟာသပိုင်းဆိုင်ရာ Content တွေမှာအရမ်းကောင်းမွန်နေတတ်သလိုအခြားအကြောင်းအရာတွေကိုရေးသားတဲ့အခါ လိုအပ်ချက်လေးတွေရှိနေတာမျိုးလည်းဖြစ်တတ်ပါတယ်။ကိုယ်သန်ရာသန် ရာအကြောင်းအရာတွေကိုပဲတစိုက်မတ်မတ်လုပ်နေတဲ့ Content Writer တွေရှိသလိုတချို့ Content Writer တွေကလည်းနားမလည်သေးတာကိုရှာဖွေပြီးကြိုးစားရေးသားတတ်ကြပါတယ်။ အဲ့ဒါကလည်းဘက်စုံတော်တဲ့ Content Writer တစ်ယောက်ဖြစ်မယ့်နည်းလမ်းကောင်းတစ်ခုလို့ ကျွန်တော်မြင်ပါတယ်။

Content Writer လောကမှာရှိတတ်တဲ့ ပြဿနာလေးတွေကတော့ Content Writer Freelancer တွေအတွက် ပေးထားတဲ့ ခေါင်းစဉ်နဲ့သတ်မှတ်ထားတဲ့ရက်အမှီ Content ကို ပြီးအောင်ရေးပေးရသလိုလုပ်ငန်းရှင်ဘက်ကမကြိုက်လို့ ပြန်ပြင်ခိုင်းတဲ့ အခါတွေရှိပါတယ်။ ဒါကလည်း ပြဿနာကြီးကြီးမားမားမဟုတ်ပါဘူး။ အချိန်မှီ ပြန်ပြင်ပေးလိုက်ရင်အဆင်ပြေပါတယ်။ တချို့ Freelancer တွေဆို Content တွေကိုကိုယ်ကကြိုးစားပြီးရေးထားပေမယ့် လုပ်ငန်းရှင်ဘက်ကမကြိုက်လို့အသုံးမပြုတဲ့အခါ စိတ်ကသိကအောက်ဖြစ်ရတာမျိုးလည်း ကြုံရတတ်ပါတယ်။အချို့ကျတော့ Content Writer ဘက်ကတစ်ပုဒ်ကိုဈေးနှုန်းအတိုင်းအတာတစ်ခုသတ်မှတ်ထားပေမယ့် လုပ်ငန်းရှင်ဘက်ကမပေးနိုင်တဲ့အခါ အခြားဈေးနှုန်းအဆင်ပြေတဲ့သူဆီက Content ကိုယူသုံးသွားတဲ့အတွက် လက်လွတ်လိုက်ရတဲ့အခါမျိုးတွေလည်းရှိပါတယ်။

Content Writer Freelancer လုပ်နေသူတွေအတွက် Content Writer ရာထူးနဲ့ Full Time အလုပ်လျှောက်ထားလို့ အင်တာဗျုးဝင်တဲ့အခါ အချို့လုပ်ငန်းရှင်တွေကမေးတတ်တဲ့မေးခွန်းတစ်ခုရှိပါတယ်။ အဲ့ဒါကတော့ တကယ်လို့အလုပ်ခန့်ဖြစ် ရင် Freelance ဆက်ရေးနေအုံးမှာလား။ ဆက်လုပ်မယ်ဆိုသတ်မှတ်ထားတဲ့အလုပ်ခွင်ထဲမှာ Freelance Content တွေ ရေးလို့မရဘူး။ Freelance Content တွေအကြောင်းတွေးနေရင်အလုပ်ဖြစ်ပါ့မလားဆိုပြီးမေးတာမျိုးတွေကြုံရတတ်ပါတယ်။

Content Writer Full Time လုပ်တဲ့သူတွေအတွက်ကတော့ လုပ်ငန်းနဲ့သက်ဆိုင်တဲ့ Content Category  ကိုကြိုတင်ရေးတစ်လစာဖြစ်ဖြစ်၊ တစ်ပတ်စာဖြစ်ဖြစ် Plan ဆွဲထားပြီးမှ ရေးသားရတဲ့သူတွေရှိသလို၊ လုပ်ငန်းနဲ့သက်ဆိုင်တဲ့အကြောင်းအရာတွေကို Update လုပ်ပြီးချက်ချင်းရေးသားပေးရတာလည်းရှိပါတယ်။ ဘာသာပြန်ပြီး ပြန်ရေးပေးရတဲ့လုပ်ငန်းတွေလည်းများပါတယ်။ လုပ်ငန်းခွင်တချို့ကတော့ လအလိုက် Content အပုဒ်ရေသတ်မှတ်ထားပြီးအချို့လည်းရက်အလိုက်သတ် မှတ်ပေးထားပြီးရေးခိုင်းတာတာမျိုးလည်းရှိပါတယ်။ သတ်မှတ်ထားတဲ့ရက်မှာ Content အရေအတွက်မပြည့်မှီတာ၊ ရေးထားတဲ့ Content တွေကိုလည်းလုပ်ငန်းရှင်ဘက်ကသဘောမကျတဲ့အခါမှာလည်းအဖုအထစ်လေးတွေဖြစ်တတ်ပါတယ်။

အဲ့ဒါတွေအားလုံးကတော့ Content Writer လုပ်ချင်သူတွေသိသင့်တဲ့အခြေခံအကြောင်းအရာတွေနဲ့ Content Writer လောကမှာဖြစ်တတ်တဲ့ အကြောင်းအရာအချို့ပါပဲ။

 

မင်းမင်းသူ

Previous Next